Qış aylarında isitmə sistemlərindən tam səmərə ala bilmək üçün radiatorların və bağlantı hissələrinin problemsiz işləməsi lazımdır. Lakin zamanla radiator krantı sıradan çıxa bilər, su sızdıra bilər və ya temperatur nizamlamasını düzgün yerinə yetirməyəcək hala gələ bilər. Bu halda radiator ventilinin dəyişdirilməsi qaçılmaz olur.
Ventili Dəyişdirməzdən Əvvəl Nə Edilməlidir?
Hər şeydən əvvəl, təhlükəsiz və problemsiz bir dəyişim üçün hazırlıq şərtdir. Çünki radiator krantının dəyişdirilməsi zamanı sistemdəki su ilə təmas ehtimalı var. Bu həm əşyalarınıza zərər verə bilər, həm də sizi çətin vəziyyətdə qoya bilər.
İlk addımda görülməli işlər:
- Kombini söndürün və fişdən çəkin. Elektriklə işləyən kombilər açıq olduqda su təzyiqi ilə bağlı risklər yarada bilər.
- Sistemdəki su təzyiqini yoxlayın. Əgər yüksəkdirsə, kombi üzərindən suyu boşaldaraq bar səviyyəsini aşağı salın.
- Radiator ventillərinin hər iki ucunu da bağlayın. Üstdəki giriş ventilini və altdakı çıxış ventilini saat əqrəbi istiqamətində çevirərək tamamilə bağlayın.
Bu addımları tamamlamadan ventili sökmək suyun daşmasına və təsisatın zərər görməsinə səbəb ola bilər.
Radiatordakı Su Necə Boşaldılır?
Ventil dəyişdirmə prosesinə başlamazdan əvvəl radiatorun içində qalan su mütləq boşaldılmalıdır. Əks halda ventil sökülərkən su qəfildən bayıra fışqıra bilər.
Radiatordakı suyu boşaltmaq üçün:
- Alt tıxacdan və ya hava alma nöqtəsindən kiçik bir qabın köməyi ilə suyu təxliyə edin.
- Əgər radiatorun içində çox su varsa, radiatoru azca əyərək daha çox suyun çıxmasını təmin edə bilərsiniz.
- Geniş bir qab və bez istifadə edərək mümkün daşmaların qarşısını əvvəlcədən alın.
Bu mərhələ, xüsusilə evin içində işləyirsinizsə, çox vacibdir. Xalça, parket və mebellərin zərər görməsini istəməzsiniz.
Köhnə Ventil Necə Sökülür?
- İlk olaraq ventilin qapağını çıxarın. Bu, adətən əl ilə çəkilərək və ya kiçik bir tornavida köməyi ilə edilir.
- Ardından, ventilin radiatora və boruya bağlandığı qaykaları (somunları) uyğun bir açar vasitəsilə boşaldın.
- Qaykaları yavaşca açaraq ventil gövdəsini çıxarın. Bu zaman hələ də bir az su çıxa bilər, hazırlıqlı olun.
Vintil çox köhnədirsə və ya ərp bağlayıbsa, sökülməsi bir az çətin ola bilər. Belə halda sökücü spreylərdən istifadə oluna bilər və ya işi daha da çətinləşdirmədən santexnikdən yardım alına bilər.
Yeni Ventil Necə Taxılır?
Bu mərhələ diqqətlə yerinə yetirilməlidir, çünki yanlış montaj gələcəkdə sızma problemlərinə yol aça bilər.
- Sızdırmazlığı təmin edin: Yeni ventili taxmazdan əvvəl yivli bağlantılara teflon lent (fum-lent) və ya maye conta tətbiq edərək sızdırmazlığı artırın.
- İstiqaməti yoxlayın: Ventil istiqamətinin düzgün olduğundan əmin olun. Giriş-çıxış istiqamətləri adətən ventilin gövdəsi üzərində ox işarəsi ilə göstərilir.
- Qaykaları sıxın: Qaykaları uyğun şəkildə sıxın. Nə çox boş, nə də hədsiz dərəcədə sıx olmalıdır.
- Qapağı taxın: Ventil qapağını yerinə taxın və istifadəyə hazır hala gətirin.
Radiator ventil dəyişimi zamanı uyğun hissə seçimi də önəmlidir. Radiatorunuzla uyğun ölçü və tipdə ventil istifadə etmək sistemin problemsiz işləməsi üçün şərtdir. Məsələn: düz, künc və ya termostatik ventil kimi fərqli tiplər mövcuddur.
Dəyişimdən Sonra Nə Edilməlidir?
Radiator ventilinin dəyişdirilməsi uğurla tamamlandıqdan sonra bəzi yoxlamalar aparılmalıdır:
- Ventilləri yenidən açın. Su sistemə təkrar dolacaq.
- Kombi təzyiqini yoxlayın. Adətən ventil dəyişimindən sonra təzyiq düşür, bu halda kombiyə bir az su əlavə edilə bilər.
- Radiatorun havasını alın. Sistemə yenidən su girərkən hava qala bilər. Buna görə də radiatorun hava alma ventilindən istifadə edərək havanı xaric edin.
- Sınaqdan keçirin. Kombini işə salaraq test edin. Yeni ventilin sızdırıb-sızdırmadığına və radiatorun qızmasına nəzarət edin.
Doğru Addımlarla Radiator Krantını Təhlükəsiz Dəyişə Bilərsiniz
Radiator ventilinin dəyişdirilməsi diqqət və qayğı tələb edən bir işdir. Lakin doğru material, doğru alət və sistematik yanaşma ilə bu işi özünüz də edə bilərsiniz.
Yenə də sızma riskinə qarşı tərəddüd edirsinizsə, peşəkar bir santexnikdən dəstək almaq uzunmüddətli perspektivdə daha təhlükəsiz bir seçim ola bilər. İstilik sisteminizin problemsiz işləməsi həm konforunuzu artırır, həm də enerji qənaəti təmin edir.
